كتير من اللي بقدموا على شغل جديد ما بياخدوا بعين الاعتبار ايش لازم يكون موجود عالـ CV، ولمّا يوصل الطلب للشركة، هادي الـCV بنتهي فيها المطاف بسلّة “النفايات”.
عشان تتطلع أي شركة عطلبك، في أشياء بسيطة ومهمة لازم تكون موجودة دايماً ومنها:
1- كيف تتواصل الشركة معك
أهم إشي لازم يكون موجود بأوّل الـCV إسمك ورقم تليفونك وإيميلك. بدون هادي المعلومات، الشركة راح تواجه صعوبة بالتواصل معك وبتضيّع على حالك فرصة العمل.
2- خبرتك مهمّة
لمّا تقرر الشركة توظفك، راح يكون بناءً على خبرتك المهنية وشهادتك وإنجازاتك. لمّا تقدّم عوظيفة معيّنة، أكتب المهمّات والمسؤوليات اللي كانت عليك في شغلك السابق أو مشاريع الجامعة وغيرها.
3- ورجيهم شطارتك
كتير مهم على الـCV تكون حاطط مهاراتك! ممكن هوايتك بالتصوير تكون سبب توظيفك مع فريق التسويق.
4- خلّيك صريح
من أكبر الأخطاء إنك تكتب إشي غير صحيح عشان تبهر الشخص اللي بدو يوظفك. بس أكتب اللي عندك خبرة فيه. إذا كاتب إنك بتحكي لغة معينة، كون واثق إنّك جد بتتقنها. كتير سهل على الشركات يكتشفوا مصداقيتك بالـCV.
5- خلّي الـCV مرتّبة
إذا تصميم الـCV مش من ضمن خبراتك، مش عيب. في كتير نماذج جاهزة على الانترنت بتقدر تستعملها ببلاش وبتعرضك بشكل لائق. ممكن تستعمل مواقع البحث عن وظائف زي بيت.كوم واللي بترتبلك المعلومات لحالها. عليك اتدخّل المعلومات وبس.
6- الغلط مش مقبول
برضه أي إشي بتكتبه تأكد إنه اللغة صحيحة وبدون أخطاء إملائية. إذا ما عرفت تعرض حالك للشركة بأحسن صورة، الشركة راح تاخذ فكرة عنّك إنّك مش مهتم كيف النتيجة بتطلع معك، وبالتالي بتخسر فرصتك. اذا محتاج مساعدة من خبراء بكتابة الـCV، بإمكانك تطلب خدمة كتابة السيرة الذاتية من بيت.كوم.
